Isiniwalat na ng ONIC PH at Blacklist International ang mga manlalarong bumubuo sa kani-kanilang koponan para sa paparating na Mobile Legends: Bang Bang Professional League – Philippines Season 8.
ONIC PH MPL-PH Season 8 roster
- Nowee “Ryota” Cabailo
- Mark Christian “Markyyyyyy” Capacio
- Kairi Ygnacio “Kairi” Rayosdelsol
- Gerald “Dlarskie” Trinchera
- Mico “Micophobia” Quitlong
- Jaylord “Hatred” Gonzales
- Paul Ian “Beemo” Sergio
- Allen “Baloyskie” Baloy
- Denver “Coach Yeb” Miranda (Coach)
Bukod sa pagkakadagdag ng mga bagong player, na sina Ryota, Mico, at Beemo, na mula sa Laus Playbook Esports, pati na rin ng bago nilang coach na si Yeb, nagbabalik din sa koponan ang dating player na si Baloyskie, mula sa Aura PH.
Pinakawalan din ng organisasyon sina Joshwell “Iy4knu” Manaog at coach Kyle “Ryo” Berceño bago ianunsyo ang bagong roster na ito.
Pumasok sa liga ang organisasyon noong ika-apat na season sa pangunguna ni Johnmar “OhMyV33nus” Villaluna. Dalawang sunod na season silang nagtapos sa ikalawang puwesto, matapos mabigo sa Sunsparks.
Noong nakaraang season, nagtapos ang koponan sa 7th-8th place matapos ilaglag ng Execration sa lower bracket ng playoffs.
Blacklist International MPL-PH Season 8 roster
- Johnmar “OhMyV33nus” Villaluna
- Danerie “WISE” Del Rosario
- Salic “HADJI” Imam
- Kiel Calvin “OHEB” Soriano
- Mark Jayson “ESON” Gerardo
- Dexter Louise “DEXSTAR” Alaba
- Edward Jay “EDWARD” Dapadap
- Kristoffer “BON CHAN” Ricaplaza (coach)
Matapos ang tagumpay ng koponan sa nagdaang season, pati na rin ang second-place finish nila sa Mobile Legends: Bang Bang Southeast Asia Cup 2021, wala masyadong nabago sa roster ng koponan maliban sa pagkakadagdag ni HADJI mula sa Omega Esports.
Magsisilbi pa rin bilang coach ng koponan ang si BON CHAN, habang substitute din si DEX STAR.
Pumasok ang Blacklist International sa liga noong ikalimang season upang kunin ang roster na binitawan noon ng EVOS PH. Naging championship contender ang koponan matapos kunin ang ‘Dynamic Duo’ nina OhMyV33nus at Wise bago magsimula ang ikapitong season.
Nakatakdang ganapin ang MPL-PH Season 8 sa mga susunod na buwan.
