Susubukan ng ONIC PH na panatilihin ang makisig nilang tindig mula sa nakaraang season papunta sa inaantabayanang MPL Philippines Season 11 kasama ng mga pamilyar at bagong mga mukha.
Katatampukan muli ng mga beterano na sina Nowee “Ryota.” Macasa, Jefferdson “Kekedoot” Mogo at Landher “Der” San Gabriel ang nasabing lineup, katuwang ang sophomores na sina Frince Miguel “Super Frince” Ramirez, Kenneth “Nets” Barro at Stephen Jasper “Sensui” Castillo.
Makakasama nila ang MPL PH rookies na sina Archie “Pancake Gaming” Guevarra at David “BOSS A.” Gamboa para ibandera ang watawat ng SONICS.
Samantala, tatangkain namang punan ni Coach Mark “Bluffzy” Reyes iniwang puwang ni Coach Jeffrey “Jeff” Manforte bilang head coach. Makakatambal niya sa posisyon ang sikat na MLBB educator at content creator na si Coach Lyrickal.
Bagamat karamihan ay rookies, nagpamangha ang ONIC PH sa MPL PH Season 10 matapos pangibabawan ang standings sa unang bahagi ng regular season. Dahilan ito para tumulak sila bilang unang koponan na nakaselyo ng playoff spot.
Gayunpaman, bigo ang koponan na maipagpatuloy ang dominasyon sa huling bahagi ng season kung saan nahulog sila sa 7-7 record sa pagtatapos ng kanilang kampanya. Hindi rin nagawa ng ONIC PH na mauga ang matibay na RSG Philippines sa playoffs na pinatalsik sila sa unang round.
Roster ng ONIC PH sa MPL PH S11
- Archie “Pancake Gaming” Guevarra Jr.
- David “BOSS A.” Gamboa
- Landher “Der” San Gabriel
- Kenneth “Nets” Barro
- Nowee “Ryota.” Macasa
- Stephen Jasper “Sensui” Castillo
- Frince Miguel “Super Frinceee” Ramirez
- Jefferdson “Kekedoot” Mogol
Sundan ang pinakahuli sa MPL-PH sa pamamagitan ng pag-like at pag-follow sa ONE Esports Philippines sa Facebook.
