Bagamat naudlot gawa ng Enhanced Community Quarantine sa Metro Manila, hindi na mapipigilan ang nalalapit na pagbubukas ng Mobile Legends: Bang Bang Professional League Season 8 (MPL PH S8).
Ang mananalo sa torneyong ito ang magkakaroon ng tiyansang maging kinatawan ng Pilipinas sa paparating na M3 World Championship sa huling bahagi ng taon.
Heto ang walong sasabak na teams sa MPL PH S8.
Lahat ng roster at teams sa MPL PH S8: TNC
TNC ang pinakabagong organisasyon na pumasok sa liga na dadalhin ang dating mga pro players na bumandera para sa Work Auster Force. Matatandaang sinelyo ng roster na ito ang spot sa liga gawa ng malinis nilang record sa qualifiers na gumulat sa maraming kupunan noong nakaraang season.
Sa adisyon nila sa mga beterao tulad nina Douglas “ImbaDeejay” Astibe at Adrian “Toshi” Bacallo, hindi na magiging sorpresa kung aarangkada ang kupunang ito pagdating ng Season 8.
TNC MPL PH S8 roster
- Frediemar “3MarTzy” Serafico
- Clarense “Kousei” Camilo
- Adrian “Toshi” Bacallo
- Douglas “ImbaDeejay” Astibe
- Patrick “P-God” Grecia
- Dylan “Light” Catipon
- Daniel “Chuuu” Chu
- Ben “Benthings” Maglaque
- Landher Mendoza San “Der” Gabriel
RSG PH
Isa sa mga international organizations na sasabak sa MLBB PH eksena ang RSG ngayong Season 8. Bubuuin ng mga manlalaro mula sa iba’t-ibang kupunan noong huling season ang RSG lineup, at kapanapanabik kung paano magsasalubong ang kani-kanilang experience para umangat sa standings.
Pangungunahan ng beteranong coach at SEA Games champion na si Brian “Coach Panda” Lim ang coaching staff ng RSG. Kaya naman tiyak na hindi basta-basta ang ipapakita ng kupunan sa balagbagan ngayong season
RSG PH MPL PH S8 roster
- Dexter “Exort” Martinez
- Kenneth Jiane “Kenji” Villa
- EJ “Heath” Esperanza
- Christian “Iy4knu” Manaog
- Elyson “Wrecker” Caranza
- Arvie “Aqua” Calderon
- Nathanael “Nathzz” Estrologo
- Eman ‘EMANN’ Sangco
ONIC PH
Ang pinakamalaking move na ginawa ng ONIC PH ngayong offseason ang pagkuha muli sa serbisyo ng superstar support player na si Allen “Greed” Baloy. Bukod dito, aandar din ang yellow hedgehog squad kasama ng mga talentadong batang players na siguradong malaki ang iaambag sa susunod na season.
Oras na lang talaga ang magdidikta bago tuluyang makuha ng ONIC PH ang kanilang korona.
ONIC PH MPL PH S8 roster
- Allen “Greed” Baloy
- Nowee “Ryota” Macasa
- Ian “Beemo” Sergio
- Mico “miicoo” Quitlong
- Gerald “Dlar” Trinchera
- Jaylord “Hate” Gonzales
- Kairi “Kairi” Rayosdelsol
Smart Omega
Inampon ng Smart Omega ang dating Execration team para bumandera sa kanila sa paparating na MPL PH season. Maraming nagpapalagay na ang black at green squad na ito ang pinakamalakas sa rehiyon gawa ng desimuladong galawan ng bawat player at perpektong chemistry ng team.
Ang mga katangian ding ito ang nagdala sa kanila sa tugatog ng MPL PH Season 7 grand finals. Kinulang man sa huli kontra Blacklist International ay naipaghiganti naman nila ito sa Mobile Legends: Bang Bang Southeast Asia Cup 2021 (MSC 2021) kung saan pinataob nila ang kupunan ng Tier One sa finals rematch.
Sa pagbubukas ng bagong season, ang Smart Omega ang tintignang team na mag-uuwi ng korona.
Smart Omega MPL PH S8 roster
- Billy “Z4pnu” Alfonso
- Joshua “Ch4knu” Mangilog
- Kielvj “Kielvj” Hernandez
- Renz “Renzio” Cadua
- Duane “Kelra” Pillas
- Patrick “E2MAX” Caidic
- Dian “Dian” Cruz
- Romeire “Allidap” Padilla
- Dean “Raizen” Sumagui
- Robert “Hito” Candoy
Nexplay EVOS
Pinakatampok sa MPL PH offseason ang tambalang nabuo ng Nexplay Esports at EVOS Esports na nagpatibay ng tiyansa ng kupunan para makapuwesto sa playoffs ngayong Season 8.
Lalo na’t babandera na para sa matunog na team ang dating Smart Omega support Jeniel “YellyHaze” Bata-anon, mataas ang tiyansang mag-iingay ang NXP EVOS sa playoffs sa pagbubukas ng liga.
Nexplay EVOS MPL PH S8 roster
- Renejay “Renejay” Barcase
- Tristan “Yawi” Cabrera
- John Paul “H2wo” Salonga
- James “Jeymz” Gloria
- Jeniel “YellyHaze” Bata-anon
- Sanford “Sanford” Vinuya
- Setsuna “Akosi Dogie” Ignacio
- Jhonwin “Hesa” Vergara
ECHO
Kasabay ng malaking adjustments na ginawa sa liga, nagbago din ng branding ang dating Aura PH team. Babandera na sa ilalim ng pangalang ECHO ang brand, bagamat kakaunti nalang mula sa dating roster ang babalagbag para sa kupunan.
Pangungunahan pa rin ni Steven “DaleDalus” Vitug at two-time MPL PH champion Michael Angelo “Arcadia” Bocado ang coaching positions, habang si Christian “Rafflesia” Fajura na lamang ang nanatiling player sa orihinal na kupunan na sumelyo ng dalawang magkasunod na kampyonato ng MPL.
Gayunpaman ay maasahang kakaibang kargada pa rin ang dala ng ECHO ngayong MPL PH S8 kasama ng beteranong mga pros na babalagbag para sa kanila.
ECHO MPL PH S8 roster
- Christian “Rafflesia” Fajura
- Benedict “Bennyqt” Gonzales
- Jankurt “KurTzy” Matira
- Jay “Jaymeister” Torculas
- Joshua “Aspect” Tating
- Kenneth “Flysolo” Coloma
- Aaron “AaronQT” Lim,
- Rion Manalo “RK3” Kudo
- Samuel Josef “Invoker” Reyes Cruz
Bren Esports
Nagbabalik ang M2 World Champions kasama ng kombinasyon ng mga beterano at bagong mukha sa eksena. Kinuha muli ng BREN ang serbisyo ng matunog na streamer at player na si Mico “Coco” Sampang na sasamahan naman ng dating Aethar star na si Raven “L3bron” Alonzo.
Kapana-panabik palagi ang dalang ideas at strategies ng world champion coach na si Francis “Duckey” Glindro. Siguradong dadalhin niya sampu ng kaniyang kupunan ang kanilang A-game lalo na’t hihirangin sa season na ito ang magiging representative ng Pilipinas para sa M3 World Championship.
Bren Esports MPL PH S8 roster
- Karl “KarlTzy” Nepomuceno
- Angelo “Pheww” Arcangel
- CJ “Ribo” Ribo
- Allan “Lusty” Castromayor
- David “FlapTzy” Canon
- Efphraim “Ejhay” Sambrano
- Mico “Coco” Sampang
- Raven “L3bron” Alonzo
- Mujahid Usman “Malik” Malik
- Dwine Gatchalian “Rimaru”Enriquez
Blacklist International
Hindi magpapahuli ang MPL PH Season 7 champions Blacklist International na susubukang depensahan ang kanilang korona ngayong season. Mas mataas ang tiyansang mapagtagumpayan ito dahil sa adisyon nila sa tinaguriang KDA machine na si Salic “HAD JI” Imam mula sa Smart Omega.
Kilala bilang ang kupunang nagpauso ng ‘nice one, baby’ meta at kalaunan ay ang ‘Ultimate Bonding Strategy’ or UBE strat, sabik ang fans makita kung ano ang baon ng Blacklist para sa MPL PH S8.
Blacklist International MPL PH S8 roster
- Mark Jayson “ESON” Gerardo
- Johnmar “OhMyV33nus” Villaluna
- Dexter “DEX STAR” Alaba
- Danerie James “Wise.” Del Rosario
- Edward Jay “Edward.” Dapadap
- Kiel “OHEB” Soriano
- Salic “HAD JI” Imam
Siguraduhing nakasunod sa official Facebook page ng MPL Philippines para sa mga importanteng updates tungkol sa liga!
