Sa mundo ng esports, madalas may mga kwentong tungkol sa sakripisyo na hindi nailalahad, mga pangarap na napag-iwanan, at walang sawang dedikasyon. Isa sa mga kwentong ito ay ang kuwento ng ama ni Alston “Sanji” Pabico na si Aaron “Vazoryo” Ram.
Sa isang eksklusibong panayam ng ONE Esports, ibinahagi ng ECHO midlaner ang kwento ng kanyang paglalakbay sa mundo ng esports at kung paano naging malaking bahagi nito ang kanyang ama.
Sa likod ng tagumpay ni Sanji sa larangan ng esports ay isang kuwento ng hindi matutumbasang suporta ng isang ama, isang pangarap na naipagpaliban, at isang samahan na mas lalo pang tumibay sa mga taon.
- War Axe vs Hunter Strike: Ano ang dapat bilhin sa 2 physical penetration items na ito sa MLBB
- 5 pinakamatinding Flicker ultimate combos na pwedeng gawin sa Mobile Legends
Ama ni Sanji muntik nang maging pro
Nagsimula ang paglalakbay ni Vazoryo sa mundo ng gaming bago pa siya maging ama. Isang magaling na manlalaro ng Dota 1, kilala siya sa kanyang natatanging galing sa virtual na labanan. Kaya’t nakakuha siya ng atensyon ng ilang koponan ng esports, na sana ay nagbukas ng pinto para sa kanya upang maging pro. Ngunit may ibang plano ang tadhana para sa kanya.
Sa oras na sana ay tutungo na siya sa pagtupad ng kanyang mga pangarap, biglang nagbago ang kanyang buhay. Natuklasan niyang magiging ama na siya, at kinailangan niyang gawin ang mahirap na desisyon. Susundan niya ba ang kanyang pangarap na maging kilalang manlalaro sa esports o bibigyan niya ng prayoridad ang kanyang mga bagong responsibilidad bilang ama at asawa? Mas pinili niya ang maging ama, itinigil ang kanyang karera sa gaming upang makasama ang kanyang pamilya.
Makalipas ang ilang taon, at ipinamalas ni Vazoryo ang kanyang impluwensya sa mundo ng gaming sa isang kamangha-manghang paraan – sa pamamagitan ng kanyang anak na si Sanji. Ang paglalakbay ni Sanji sa mundo ng gaming ay nagsimula noong siya ay limang taong gulang pa lamang. Siya’y ipinakilala ng kanyang ama sa mundo ng PC gaming, dinala siya nito sa mga lokal na internet cafe kung saan naglalaro sila ng Dota at Counter-Strike nang magkasama. Ang pagsasamang ito ang bumuo ng malalim na ugnayan sa pagitan ng mag-ama, habang lumalaban sila kasama ang iba pang players sa kanilang lugar.
Tinupad ni Sanji ang pangarap ng kanyang ama sa esports
Dahil sa maagang pagsilay ni Sanji sa gaming, sumiklab ang kanyang passion para dito. Sa tulong ng kanyang ama bilang tagapayo at kasamang manlalaro, pinalakas niya ang kanyang mga kasanayan at unti-unting sumulong sa mundo ng competitive gaming. Sa amateur na Mobile Legends: Bang Bang (MLBB) scene siya nagsimulang makilala, na kaakibat ang patuloy na pagsuporta ng kanyang ama sa bawat hakbang ng kanyang pag-akyat.
Gayunpaman, hindi nawala ang mga pagsubok sa paglalakbay ng MLBB player sa amateur scene. Kinaharap niya ang mga hadlang at pagdududa, ngunit ang di-matumbasang suporta ng kanyang ama ang nagbigay inspirasyon sa kanya na magpatuloy. Natupad ang pangarap ni Sanji na maging pro esports player nang sumali siya sa ECHO.
Unti-unting nakilala si Sanji sa kanyang pagsisimula sa ECHO. Ginulat niya ang marami nang isali siya sa main lineup para sa MPL PH Season 10 at kasunod nito ay tinulungan ang kanyang koponan sa M4 World Championship. Nagmamalaking nanood ang ama ni Sanji habang tinutupad ng kanyang anak ang pangarap nito sa mundo ng esports.
Nagpapasalamat nang labis si Sanji sa papel ng kanyang ama sa kanyang karera sa gaming. Ang suporta at inspirasyon ng ama ang naging instrumento sa tagumpay ng anak. Utang ni Sanji sa kanyang ama ang pagtuturo sa kanya ng halaga ng sipag, dedikasyon, at pagtitiyaga.
Bukas-palad namang naghahatid ng suporta ang ama ni Sanji sa kanyang anak. Ipinapaalala niya kay Sanji na laging ibigay ang kanyang pinakamahusay at maging matiyaga sa kanyang mga pagsisikap, sa loob man o labas ng Land of Dawn. Hindi lamang nagiging pinagmumulan ng passion at kompetisyon ang gaming para sa mag-amang ito kundi pati na rin isang paraan upang palalimin ang kanilang ugnayan.
Ngayon, habang umaani ng tagumpay si Sanji sa kanyang karera sa esports, patuloy pa rin siyang naglalaro ng PC games kasama ang kanyang ama, tulad ng dati noong siya’y bata pa. Hindi lamang propesyon ang gaming para sa kanila kundi isang pambihirang paraan ng pagsasama ng ama at anak na higit pa sa limitasyon ng digital na mundo.
Ang kwento nina Vazoryo at Sanji ay patunay sa lakas ng suporta ng pamilya, sakripisyo, at di-mapapantayang ugnayan ng ama at anak. Habang patuloy na umuusad ang bituin ni Sanji sa mundo ng esports, nariyan pa rin nang may pagmamalaki ang kanyang ama, isang paalala na ang ilang pangarap, bagamat naantala, ay maaaring mahanap ang bagong buhay at layunin sa tagumpay ng susunod na henerasyon.
Para sa iba pang balita at guides tungkol sa gaming at esports, i-like at i-follow ang ONE Esports Philippines sa Facebook.
BASAHIN: Silipin ang hinaharap gamit ang Neon Shingetsu Pharsa, ang kanyang unang Epic skin
