Sa ikalimang sunod na season, ibabandera nila star players John Paul “H2wo” Salonga at Renejay “Renejay” Barcarse ang Nexplay EVOS sa MPL Philippines Season 10.
Inilahad kamakailan ng NXPE ang kanilang kumpletong roster para sa darating na season tampok ang mainstay jungler na si H2wo at EXP laner-turned-roamer na si Renejay, na parehong bahagi na ng koponan mula pa noong nakapasok sila sa MPL PH noong Season 6.
Nanatili rin sa fan-favorite team sina Setsuna “Akosi Dogie” Ignacio, na nagsilbing coach sa nakalipas na season, veteran midlaner Jeniel “YellyHaze” Bata-anon, at sophomores na sina gold laner Mariusz “Donut” Tan at midlaner Emanuel “Elpizo” Candelaria.
Nagbabalik naman sa lineup sina EXP laner James “Jeymz” Gloria at midlaner Lance “LanceCy” Cunanan habang ipinakilala bilang mga bagong miyembro sina dating ONIC PH roamer Mico “Micophobia” Quitlong at jungler Ken Louie “Kzen” Pile, na naglaro para sa NXPE noon sa ONE Esports MPL Invitational 2021.
Bago ang anunsyo, pinakawalan ng Nexplay EVOS sina Rainiel “URESHIII” Logronio, Kenneth “Cadenza” Castro, Michael “MP The King” Endino, Jhonwin “Hesa” Vergara at Jeff “S4gitnu” Subang. Si head coach John Michael “Zico” Dizon naman ay nagtungo sa Cambodia para gabayan ang BURN x FLASH.
Kumpletong roster ng Nexplay EVOS para sa MPL PH Season 10
- John Paul “H2wo” Salonga (jungler)
- Renejay “Renejay” Barcarse (roamer)
- Jeniel “YellyHaze” Bata-anon (mid)
- Mariusz “Donut” Tan (gold laner)
- Emanuel “Elpizo” Candelaria (mid)
- James “Jeymz” Gloria (EXP laner)
- Lance “LanceCy” Cunanan (mid)
- Mico “Micophobia” Quitlong (roamer)
- Ken Louie “Kzen” Pile (jungler)
- Setsuna “Akosi Dogie” Ignacio (coach)
Nasulyapan na ang galawan ng bagong roster ng Nexplay EVOS sa Sibol MLBB qualifiers para sa International Esports Federation (IESF) 14th World Esports Championship kung saan binuo ang koponan nila H2wo, Micophobia, Jeymz, Donut at Elpizo. Sa kasamaang palad, agad silang nilaglag ng ECHO PROUD sa second round ng qualifiers.
Sa darating na MPL PH Season 10, susubukan nila H2wo, Renejay at kanilang mga kasamahan na malagpasan ang kanilang 5th-6th place finish noong nakaraang season.
Nagtapos ang NXPE sa 5th spot ng standings noong Season 9 hawak ang 19 points mula sa 6-8 win-loss series record. Subalit pinatalsik sila ng ONIC PH sa iskor na 3-2 sa kanilang kapana-panabik na play-in match.
Subaybayan ang mga MPL PH roster changes sa ONE Esports Philippines Facebook page.
