Nagsasalpukan ang pinakamalalakas na Dota 2 teams sa buong mundo sa loob ng isang buong season na kung tawagin ay Dota Pro Circuit (DPC). Pangunahing layunin ng mga koponan na makapasok sa The International (TI), ang pinakaprestihiyosong torneo ng Valve na nagtatampok ng milyon-milyong dolyar na prize pool.
Noong nakaraang taon lang, inuwi ng Eastern European squad na Team Spirit ang lion’s share na mahigit US$18 milyon ng lampas US$40,018,195 prize pool ng The International 10.
Upang makapasok sa TI, kinakailangan ng mga koponan na makalikom ng sapat na DPC points para makaselyo ng direct invite sa naturang event. Nakukuha ito sa pamamagitan ng pagtala ng magandang placing sa isang liga o major tournament.
Ang tumatakbong Dota Pro Circuit (DPC) 2021-2022 season ay nahahati sa tatlong bahagi: ang Tour 1, 2 at 3. Lahat ng Tour ay tinatampok ang anim na regional leagues at international Major LAN events, maliban sa Winter Major ng Tour 1 na nakansela dahil sa umusbong na bagong variant ng COVID-19. Nakataya sa mga ito ang DPC points.
Katulad ng dalawang nakalipas na edisyon, direktang maiimbitahan sa The International 2022 ang top 12 teams sa DPC point standings sa pagtatapos ng season. Anim naman ang makakapasok sa pamamagitan ng regional qualifiers at dalawa mula sa wildcard tournament para sa sumatotal na 20 koponan.
Narito ang kasalukuyang top 20 sa DPC point standings ngayong 2021-2022 season na may tsansang makaselyo ng direct invite sa TI11.
Ang kasalukuyang DPC point standings ngayong 2021-2022 season
Bagamat hindi nakadalo sa ESL One Stockholm Major, nangunguna pa rin sa DPC point standings ang Chinese powerhouse na PSG.LGD dahil sa kanilang dominasyon sa regional league at regional finals.
RANK | KOPONAN | DPC POINTS | REHIYON |
1st | PSG.LGD | 1400 | China |
2nd | TSM | 1280 | North America |
3rd | OG | 1140 | Western Europe |
4th | Gaimin Gladiators | 1130 | Western Europe |
5th | Thunder Awaken | 1040 | South America |
6th | beastcoast | 995 | South America |
7th | Fnatic | 820 | Southeast Asia |
8th | Team Spirit | 790 | Eastern Europe |
9th | Tundra Esports | 712 | Western Europe |
10th | BetBoom Team | 640 | Eastern Europe |
10th | Team Aster | 640 | China |
12th | Boom Esports | 622.5 | Southeast Asia |
RANK | KOPONAN | DPC POINTS | REHIYON |
13th | Team Liquid | 590 | Western Europe |
14th | Evil Geniuses | 552.5 | North America |
15th | T1 | 328.3 | Southeast Asia |
16th | Quincy Crew | 282.49 | North America |
17th | Xtreme Gaming | 240 | China |
18th | Royal Never Give Up | 238.24 | China |
19th | Infamous | 190.72 | South America |
20th | PuckChamp | 180 | Eastern Europe |
May 17 koponan pa ang may hawak ng 160.05 DPC points pababa, kabilang na ang Team Secret na nasa 27th spot dala ang 59.5 points. Lahat sa kanila ay may tsansa pang umangat sa DPC point standings basta makakuha ng mataas na placing sa kanilang regional league, makapasok sa Arlington Major at sumunggab ng sapat na puntos dito.
Para sa mga balita patungkol sa Dota Pro Circuit, maaari niyong i-like at i-follow ang ONE Esports Philippines sa Facebook.
Hango ito sa artikulo ni Nigel “Zim947” Zalamea ng ONE Esports.