Ipinakilala na ang bagong roster ng ECHO para sa susunod na season ng Mobile Legends: Bang Bang Professional League Philippines at tampok dito ang pinakamalalaking free agents ngayong off-season.
Sa isang social media post, tinuldukan na ng organisasyon ang mga haka-haka tungkol sa mga bago nilang miyembro. Opisyal na kasi nilang inanunsyo sina Karl Gabriel “KarlTzy” Nepomuceno, Tristan “Yawi” Cabrera, Frediemar “3MarTzy” Serafico, at ang nagbabalik na si Ashley Marco “Killuash” Cruz bilang parte ng kanilang koponan para sa MPL PH Season 9.
Si KarlTzy ay nakuha ng ECHO mula sa Bren Esports. Maituturing ‘end of an era’ ang pag-alis ng nasabing manlalaro sa dati niyang koponan dahil sa ilalim nito niya nakamtan ang mga kampeonato sa MPL PH Season 6, M2 World Championship at pati na rin MVP sa nasabing international tournament.
Ang pagpasok naman ni Yawi sa bagong roster ng ECHO ay nangahulugan sa pagkakawatak-watak ng ‘Big Three’ ng Nexplay EVOS na binubuo niya at nina John Paul “H2wo” Salonga at Renejay “RENEJAY” Barcarse.
Screenshot ni Maouie Reyes/ONE Esports
Samantala, nagsama naman sa isang koponan ang dalawa sa pinakamahuhusay na EXP Laner sa bansa matapos bumalik mula sa retirement si Killuash kasabay ng pagsali ni 3MarTzy mula sa TNC Pro Team.
Bagong roster ng ECHO para sa MPL PH Season 9
Screenshot ni Maouie Reyes/ONE Esports
- Rion “Rk3” Kudo
- Frederic Benedict “Bennyqt” Gonzales
- Karl Gabriel “KarlTzy” Nepomuceno
- Christian “Rafflesia” Fajura
- Ashley Marco “Killuash” Cruz
- Aaron “Aaronqt” Lim
- Tristan “Yawi” Cabrera
- Frediemar “3MarTzy” Serafico
- Jankurt Russel “KurtTzy” Matira
- Jaymark Aaron “Hadess” Lazaro
Bagamat wala pang anunsyo ukol sa opisyal na petsa ng susunod na season, inaasahang magsisimula ito sa unang quarter ng susunod na taon.
BASAHIN: Blacklist International ido-donate ang bahagi ng kanilang premyo sa mga biktima ng Typhoon Odette
